Mari Thess
Ngayong darating na Sabado (May 29) sa Magpakailanman, balikan ang natatanging kuwento ng magkakapatid na nawalay sa kanilang ina at natutong lumaban sa murang edad.
Lingid sa kaalaman ng ina ni Alexis (John Kenneth Giducos) na sinasaktan ito ng kaniyang stepfather habang nakikipagsapalaran siya sa Maynila. Sa murang edad ay naiwan kay Alexis ang responsibilidad na alagaan ang kanyang mga nakakabatang kapatid – si Aljur (Seth Dela Cruz) at AJ (Khaine Dela Cruz) na may Cerebral Palsy.
Nang mas naging bayolente ang kanyang stepfather ay lumayas siya kasama ang kapatid na si AJ at naiwan si Aljur sa kanyang ama. Dumidiskarte si Alexis kung paano mapapakain at mabubuhay ang kanyang maysakit na kapatid.
Para ‘di lumiban sa klase, buhat-buhat ni Alexis si AJ patungong eskwelahan na siyang kinunan naman ng litrato ng kanyang guro. Nag-viral ang litrato sa social media at hinangaan si Alexis sa kanyang kasipagan at pagmamahal sa kanyang kapatid na may kapansanan.
Tunghayan ang nakakaantig na kwento ng “Kuya na, Nanay Pa: The Alexis Peralta Story” ngayong Sabado, 8 PM, sa Magpakailanman.
