Mari Thess
Paliit nang paliit ang mundong ginagalawan ni Cardo (Coco Martin) dahil isang malakihang manhunt ang isinasagawa ng kanyang mga kalaban para tugisin at wakasan ang buhay niya sa “FPJ’s Ang Probinsyano,” na napapanood gabi-gabi sa Kapamilya Channel, A2Z, at TV5.
Mas malakas ang mga kalabang haharapin ni Cardo dahil sa pagsasanib-pwersa nina Renato at Arturo (John Arcilla at Tirso Cruz III), dalawa sa pinakamakapangyarihang opisyales ng gobyerno. Parehong nanggigigil sa galit sina Renato at Arturo kay Cardo dahil akala nila na ito ang responsable sa pagkamatay ng kanilang mga mahal sa buhay.
Pagkakataon din ito ni Renato upang sirain ang reputasyon ni Cardo sa publiko at mapabango ang kanyang imahe sa paparating na halalan.
Ngunit wala ring kamalay-malay si Renato na pinagsasamantalahan lamang ni Arturo ang kapangyarihan niya upang gantihan si Cardo. Alam kasi ni Arturo na ang totoong pumatay sa malapit na tauhan ni Renato ay hindi si Cardo kundi ang Black Ops.
Hanggang kailan matataguan ni Cardo ang mga grupong tumutugis sa kanya?
Huwag palampasin ang “FPJ’s Ang Probinsyano” gabi-gabi sa Kapamilya Channel, A2Z, TV5, CineMo, Kapamilya Online Live sa YouTube channel at Facebook page ng ABS-CBN Entertainment, iWantTFC, WeTV, at iflix. I-rescan lang ang anumang digital TV box na ginagamit sa bahay, gaya ng TVplus box, para mapanood sa TV5 at A2Z ang mga bagong episode ng “FPJ’s Ang Probinsyano.” Para sa viewers sa labas ng Pilipinas, mapapanood ito sa The Filipino Channel sa cable at IPTV.
