Mari Thess
Magmula nang ipatupad ang enhanced community quarantine sa bansa, kaniya-kaniyang paraan ng pagpapalipas oras ang ginagawa ngayon ng lahat sa kanilang tahanan.
Para sa Bilangin ang Bituin sa Langit stars na sina Mylene Dizon at Kyline Alcantara, pagtatanim sa kanilang bakuran ang trip nilang gawin habang naka-quarantine.
Mula pa noong Marso 17 ay sa Silang, Cavite naka-base si Mylene na likas daw na mahilig magtanim ng mga gulay at prutas. Magandang panahon na bigyang-pansin ang hobby na ito ng Kapuso actress lalo pa at hinihikayat din ng kinauukulan na magtanim ang mga tao sa kanilang bakuran upang hindi lang sa palengke umaasa ng food supply.
“Inumpisahan ko ‘to nu’ng lockdown kasi dati nu’ng nagte-taping ako lagi hindi ko na masyadong nabibigyan ng pansin pero ngayon, araw-araw at least naaasikaso ko ‘yung garden ko. Importante kasi ang food security lalo na sa mga panahon na ito,” ani ni Mylene.
Sa Bicol naman nagpapalipas ng quarantine si Kyline na nahihilig din sa pagba-backyard farming, “Katulad nga po ngayon, lockdown, hindi po natin kailangan maging dependent sa palengke at makatutulong pa po tayo sa ating mga frontliners dahil mas male-lessen pa po ang ating paglabas-labas,” lahad ng aktres.
Habang tigil muna sa taping, pansamantalang mapapanood ang Alyas Robin Hood kapalit ng Bilangin ang Bituin sa Langit sa GMA Afternoon Prime.
