Mari Thess
Nangyari na ang pinakahihintay na pagkikitang muli ni Rica (Charlie Dizon) at Kyle (Joshua Garcia) sa “Viral Scandal” matapos sagipin ng dalaga ang lalaki nang muntik itong mahulog sa building nitong Miyerkules (Dis.17).
Nakatakdang magkatagpo ang dalawa sa job interview noong umaga ngunit hindi sumipot si Rica matapos niyang makita si Raven (Kaila Estrada) na papasok sa Balai Arkitektura. Tingin niya, sign ito para kunin ang trabaho sa Ilo-ilo.
Nang malaman naman ni Kyle na hindi na tutuloy ang dalaga, agad niyang pinuntahan ang bahay nito. Tinanong niya si Nico (Louis Abuel) kung nasaan si Rica at sinagot siya nito na baka umalis na ang kanyang kapatid papuntang Ilo-ilo.
Pumunta na lamang siya sa building kung saan niya unang sinagip si Rica. Sa kanyang pag-iisip sa dalaga, makikita niya ang isang balabal na nilapad ng hangin. Sinubukan niya itong kunin hanggang namalayan niyang nasa hangganan na siya ng building. Hindi naman siya tuluyang nahulog dahil naakap siya ni Rica.
Sa mga susunod na episode, patuloy na kukumbinishin ni Kyle ang dalaga tungkol sa pagtratrabaho sa Balai Arkitektura. Bibigyan niya ito ng isang araw para makapagdesisyon at aantayin niya ito sa kanyang opisina sa susunod na araw.
Tanggapin na kaya ni Rica ang offer ni Kyle?
Subaybayan ang “Viral Scandal” gabi-gabi ng 9:20 PM sa Kapamilya Channel, A2Z, TV5, Kapamilya Online Live, Jeepney TV, iWantTFC, WeTV iflix. Para sa viewers sa labas ng Pilipinas, mapapanood ito sa The Filipino Channel sa cable at IPTV.
